SOFÁ E MANTA .LECTURAS COMPARTIDAS 1

Un poema para ler, recitar, rapear, cantar, palmear...
disfrutar e compartir

UN VERSO PARA CANTAR

PEPE CÁCCAMO

A CANCIÓN DO UNIVERSO.

                   UN POEMA

PARA SOÑAR CO SISTEMA SOLAR.

SAÍRON OS PLANETAS

  DUNHA MALETA?

    NON. QUE NON.

        ELES SON

ANACOS DE EXPLOSIÓN

DUNHA NEBULOSA ROSA.

  OBRADOIRO DE ESCRITURA .PROPOSTA:   Facer un acróstico

 Lembra que un acróstico é  unha composición na que as letras iniciais, medias ou finais dos versos, lidas en sentido vertical forman unha palabra ou unha frase.Por exemplo:

Fermosas                   Perfecta                

Lilas                          Obra

Orquídeas e                Escrita

Rosas                        Solitaria

                                   Ideal

                                  Alegre

E agora serías quen de facer un acróstico co nome dun PLANETA?

Queres compartilo con todos nós? Envíao ao correo da biblio bibliouniomugardesa@gmail.com ou escríbeo aquí abaixo en comentarios.

Esperamos os teus acrósticos para publicar no blog.

5 motivos para ler POESÍA

Cinco motivos para ler poesía 

FRAN ALONSO

1.- A POESÍA É UNHA BARRICADA DE PALABRAS REBELDES que ilumina o camiño da vida e deita luz sobre o mundo. A poesía non morde, non manca e, aínda que haxa quen pense o contrario, non é aburrida, nin cursi, nin difícil. E hai moitos tipos de poesía para que elixamos.

 2.- A POESÍA SERVE PARA LER, CANTAR, DISCREPAR, BERRAR, RECITAR, rapear, musicar, declararse, rebelarse contra o mundo ou unicamente para falar suave á orella. Tamén é un somnífero para durmir ben, unha pastilla sen química que mellora a saúde e o benestar e aguiza o pensamento. Serve, sobre todo, para explicar as razóns e as emocións que non veñen no dicionario.

 3 .-OS POEMAS SON COMO CAIXAS DE FERRAMENTAS, VALEN PARA TODO: para sentilos, manosealos, lelos, cheiralos, gardalos nun armario, ensucialos, para ligar, para poñelos enriba da cabeza, penduralos na parede, limpalos, recortalos, reescribilos, merendalos nun bocadillo de papel, ordenalos, metelos na neveira e lelos coa cabeza máis fría, ou deixalos sobre a cama para devoralos á noite, clandestinamente, cando todos se deitaron. A poesía cura enfermidades como a impaciencia, os nervios, os granos da cara, os pés planos, a dor de cabeza, as feridas imprevistas, as dores de amor, as indixestións, os enfados, a ansiedade e as gripes. 

4.- A POESÍA PODE ESTAR NAS COUSAS QUE NOS RODEAN A DIARIO, nas letras das cancións, no graffiti da parede do barrio, na soidade, no supermercado, nun sorriso inesperado, na moto, nas causas xustas, no váter, na esperanza, no calexón sen saída, no mar contaminado, na tristura, no ceo cuberto, no ordenador, nun berro, na paisaxe, na conversa e nas rúas. Onde ti queiras. 

5.- O IMPORTANTE DA POESÍA NON É OBSESIONARSE CON DESCIFRALA senón saber sentila, gozala e intuíla. Na poesía reconforta sentir a forza das súas palabras, o seu ritmo, a súa musica, a súa sonoridade, as chiscadelas que por veces nos deslumbran, as imaxes fascinantes que nos ofrece. E tamén os seus enigmas. Poetizarse. En definitiva, facer da poesía un pracer. 

Fran Alonso

MULLERES GAÑADORAS

O pasado mes de febreiro, as rapazas de 2º de Educación Primaria, no marco da materia “Valores sociais e cívicos” presentaron a súa obra “Mulleres gañadoras” como produto final dun proxecto cooperativista para traballar a igualdade no deporte. O mundo do deporte é un dos eidos onde máis se pon de manifesto a falta de igualdade entre homes e mulleres. A finalidade deste proxecto foi, dun lado, visibilizar ás mulleres deportistas e, por outro, aprender a traballar de xeito cooperativo, formando un único equipo durante todo o proceso de preparación, que pasamos a resumir agora.

Logo da lectura conxunta do libro, cada rapaza escolleu unha das protagonistas do mesmo. Resumida a súa historia, memorizamos un texto sobre cada unha delas, antes de traballar na posta en escena. Quixemos darlle especial énfase a este aspecto, para lograr maior impacto nos nosos espectadores.

Cada rapaza vestiríase caracterizada da súa personaxe. Para conseguir os disfraces, empregamos material do colexio pero tamén da propia casa, e compre salientar que unhas prestaron a outras o  que non tiñan.

A secuencia da obra era a seguinte: María, a mestra de Educación Física, está na súa casa lendo o libro das mulleres deportistas. Cada vez que pasa a páxina e cae nunha nova personaxe, a rapaza en cuestión aparece desde detrás do público, para causar efecto sorpresa. Logo de situarse diante dos espectadores, interpreta individualmente o seu papel: preséntase como a súa personaxe e fai un resumo dos seus logros.

Tivemos a sorte de contar con música en directo, grazas a colaboración de Paula, a mestra de música, e o alumnado de 6º de Primaria. Cada vez que entraba unha personaxe, soaba unha peza de música acorde o seu país de procedencia ou a súa actividade.

Só cabe felicitar as rapazas de 2º pola súa marabillosa actuación, e, por riba de todo, polo seu magnífico traballo durante todo o mes de preparación. Parabéns equipo!!!

DÍA DA CANDELORIA

Contacontos na biblio polo día da paz.

Para conmemorar o Dia da Paz tivemos unha sesión de contacontos na biblioteca.
Unha sesión moi especial con música de violín en directo , nun ambiente moi íntimo arredor do Kamishibai e un fermosísimo conto , " Cores que se aman".

Grazas  Rebeca, Noemí , Carlota e Naiara polo voso tempo e parabéns!!!

POEMAS COMPARTIDOS NO DÍA DA PAZ

LEMBRANZAS PARA ALÍ SMAÍN

Choven balas

seres berran

arden vilas

queiman leiras

caen nenos

chora a terra

xeme o pobo

pingas negras

cicatrices

dor vermella

destrución

chuvia cega

berros tristes

dor marela

choven balas

e miseria

noite fría

tristes guerras

nace o medo

chora a terra.

Antonio García Teijeiro

Coñecedes este cadro?

Queredes coñecer moitísimas cousas máis? Pois estade moi atentas e atentos ao seguinte vídeo :

EXPOSICIÓN DE ARTE DE EDUCACIÓN INFANTIL

Durante este primeiro trimestre unha seleción de libros relacionados coas artes plásticas viaxaron da biblio ao  ambiente de arte de Ed.Infantil.
Todos estes libros axudaron a todos os nenos e nenas a inspirarse para ...
Queredes ver para que lles serviron?
Pois ...dentro video!!!

CONTACONTOS NA BIBLIO : ASOCIACIÓN APELÓN

A QUE SABE A LÚA?

"Había moito tempo que os animais andaban a matinar a que sabía a lúa. Era doce ou salgada?
Só querían probar una anco pequeno.Polas noites, miraban ansiosos para o ceo (...)

A HISTORIA DOS BONOBOS CON LENTES

(...) Os bonobos que quedaron continuaron lerianso e comendo froitas e bagas, noces e
sementes,  raíces e brotes que as bonobas recollían para eles" (...)

(...) Winnie the Witch looked out of her window and shivered. Heer garden was covered in snow" (...)



Pois sí, un curso máis tivemos a gran sorte de que a Asociación Apelón estivera na nosa biblioteca . Escoitamos o conto A que sabe a Lúa? que nos contou Aida , a nai de Xoel; Juan , o avó de Carlota e Adriana, contounos  a historia dos Bonobos e Victoria presentounos unha nova aventura de Winnie the Witch.
Moitísimas grazas aos tres e a todos e todas as persoas da Asociación que fan posible que se leven a cabo estas iniciativas.

RECOMENDACIÓNS NADAL 2019