OS MAIOS
 |
| Tastarabás. Enciclopedia dos brinquedos tradicionais. Antón Cortizas. |
A construción dos
Maios é unha vivencia lúdica que se celebra co gallo da floración luxuriosa da
primavera. Ao longo do país constrúense diferentes tipos de Maios, entre os que
citamos:
Maio humano. Unha
persoa é cuberta totalmente con ramalleira de xestas e flores silvestres de
todo tipo.
Maio cónico ou
piramidal. Constrúese unha sorte de cono ou pirámide florida, que se circunda
con rosarios feitos de carrabouxos, laranxas ou ovos. Nalgúns lugares, no seu
interior vai un neno que fai de Maio.
Maio arbóreo:
Outras veces o Maio é unha árbore que se tala do monte e lévase ao lugar máis
céntrico da parroquia ou lugar.
Maios de altar.
Os Maios son tamén unha sorte de altares floridos situados sobre unha caixa ou
unha mesa, cuberta cunha saba ou mantel. Sobre ela ármase calquera
ornamentación floral, combinando flores, cores e tamaños. Úsanse para estes
Maios elementos auxiliares como poden ser xarros para colocar neles as flores.
Pratos do maio. Os maios máis sinxelos fanse cun pratiño pequeno, de
louza, no que se coloca unha imaxe, quer tradicionalmente era unha estampa, e
sobre ela unhas poliñas de fiúncho e algunhas flores miúdas. Con este prato os
cativos piden o Maio polas casas da veciñanza.
Maios artísticos:
Modernamente realízanse Maios máis complicados, dándolles formas variadas, que
poden atinxir mesmo verdadeiras escenificacións floridas.
Maios protectores. Aínda hai Maios, que sen case chegaren a selo, son
sinxelas pólas floridas de xestas e outras especies que se colgan das portas e
xanelas como elemento protector.
No hay comentarios:
Publicar un comentario